Yogastallanvuogit
Muosát ráfi ja nuppástumi min erenoamáš fálaldaga bokte. Davvi Yoga fállá kundalini yoga, yin yoga ja goŋŋastallama, guhte ge iežas erenoamášvuogaidisguin. Buot dát nannen dihtii du rumalaš ja mielalaš dili.
Yin Yoga
Yin yoga lea sivvadis ja meditatiivalaš yogastallanvuohki man fokus lea buoridit varajođu vanahaladettiin suonaid ja ligameanttaid - fierpmi lađđasiid birra - ja guhkkidettiin rupmaša čatnangođđosa - fascia. Dát váikkuha ja rahpá energiijageainnuid, dahká buori olbmo fysálaš ja mielladillái ja dovdduide.
Fascia lea dego joaibmašuvnna livskobihttá dehkiid ja dávttiid birra. Jus dat ii jámma beasa lihkadit, de stirdu ja bávččastisgoahtá.
Lihkastagat bistet guovttis gitta guđa minuktii, muhtimin gitta 20 minuktii, ja leat erenoamáš buori olbmuide geat leat roasmmohuvvan dahje geain leat bissovaš bákčasat. Yin yogas bargat erenoamážit čoarbeliiguin, gátnasiin ja čilggiin.
Kundalini yoga
Kundalini yoga lea yogastallanvuohki mii hástuha ođđa jurddašeapmái ja boktá diđolašvuođa go njeaidá gáržžidusaid maid alcceseamet bidjat. Dat veahkeha beassat eret cieggan oainnus ja nanusmahttá min gamusdovddu dahje intuišuvnna. Kriyaiguin loktet energiijja rupmašis vai olahivččiimet allelat diđolašvuhtii, seammás go nannet nearvasystema, bargat rávssáiguin, buhttistat vara ja jaskkodahttit miela. Kundalini yoga gohčoduvvo danne ge diđolašvuođa yogan.
Yogastallat dán vuogi mielde gáibida nana dáhtu go šaddá vuoitit ego badjel mii ii dáhto rievdat. Yogastallan dahká ahte sáhttit olahit iežamet duohta siskkimussii ja ahte áddegoađašeimmet manne min siellu lea dán máilmmis.
Yogastallamiin čatnasit miella, rávssát ja nearvasystema oktii ja sáhttit de rievdadit dáid nu ahte ealášeimmet eambbo diđolažžan ja duohtan.
Goŋŋastallan
Vibrašuvnnat mat goŋŋas riegádit, leat erenoamážat. Min jierbmi ii nagat áddet daid, ja miella vuollána. Dát vuolláneapmi dahká ahte vuoiŋŋastat lossadit, ja vuojut čiekŋalis siskkáldas jaskatvuhtii.
Goŋŋastallamis yogastallat vuos ovttas. Ja de velledat láhttái ja dušše leat, dan botta go goŋŋa čuodjá.
Jietna bajiduvvo cehkiid mielde ja jienat dávistit gitta olbmo siskkimussii, ceallaid rádjai. Jietna bajiduvvo vilges jiena muddui - "white sound" rádjai, ja dát jietna dat sáhttá doalvut olbmo čiekŋalis meditiivválaš dillái ja jaskatvuhtii. Danne gohčoduvvo goŋŋa maiddái gievrramus šamanistálaš čuojanassan yogas.
Goŋŋa čuojahuvvo jogo vuoiŋŋasteapmái dahje meditašuvdnan. Sáhttá čuojahuvot eaŋkil olbmuide dahje joavkkuide. Goŋŋavuoiŋŋasteamis lea jietna litnásat go goŋŋameditašuvnnas ja soaitá dušše finadit bajimus ceahkis.
White sound ii heive áhpehis olbmuide ii ge mánáide mat eai leat vel pubertehtii joavdan.
“Goŋŋa lea sivdnádusa jiena skádja, skádja dan jienas mii gullui go universa riegádii.”