Berit Nystad
Davvi Yoga oamasteaddji
Mun lean Ovllá-Kirstte Biret ja mu yogamátki álggii go orron Oslos. De muhtin beaivvi čákŋalii bargosadjái muhtin čuvgesvarat, guhkes nissonolmmoš, gárvodan vielgadin ja giessan vilges livskku oaivvi birra. In máššan, ja imaštallen manne bat nie lea gárvodan.
Dalle vuosttas geardde gullen sáni kundalini yoga. Álgen dasa.
In mun dal dakkaviđe lean nu gesson dasa, muhto juoidá dat lei. Áigi goas bessen leat iežainan - vanahallat, nagadit lihkastagaid, gierddahallat. Dovdat suhtu mii badjánii go eat goassážii ge geargan - ii got vel nohkan? Ja meditašuvnnat - Ardas Bhaee Amar Das Guru. Mun otná dan beaivvi njuorrasan go gulan dan šuoŋa maid lávlluimet.
Urbi lei rahpasan. Áibbašin eará áddejupmái. Hárjehusat, buot dat ollu meditašuvnnat, tantra, ustitvuohta mii riegádii, veahkehedje mu ovdánit, ja lean ain jođus - stuorámus yoga lea eallin ieš.
Go fas ruoktot fárrejin, de álgen oahpahit yoga, vaikko in lean ge makkár oahpuid vázzán. Mun čuovvolin ávžžuhusa oahpahišgoahtit dan veahá maid máhtten. Čuvvon yogagirjjiid bagadusaid ja čuojahin meditašuvnnaid maid leimmet kopieren nuppi kasseahtas nubbái - lobiheamet, jáhkan mun dál.
Vuoiŋŋalašvuohta, masa kundalini yoga ge doalvu, ovdána cehkiid mielde. Okta ceahkki lea biehttaleapmi. Olmmoš gávdná sivaid manne yoga ii oro man ge veara - dušše danne amas dárbbašit guorahallat iežas. Ego ii dáhtto nuppástuvvat.
De bođii vel oktii Sat Nam Kaur veahkkin, son gii mu oahpásmahtii kundalini yogai - ja su dieđuid vuođul álgen yogaoahpaheaddji ohppui, ja buot manai fas sadjái.
Dál lean kundalini yoga oahpaheaddji 2. dásis, oahppan goŋŋačuojaheaddjin, vázzán buot lágan yogakurssaid, maiddái yin yoga oahpu. Ja issoras giitevaš go beasan didjiide oahpahit.
Gunvor Guttorm
Ovttasbargoguoibmi
Petter-Iŋggá Gunvor lea oahppan ashtanga yoga oahpaheaddjin ja lea váldán lassioahpu rocket ja yin yogas. Son lea yogastallan badjel 20 jagi. Son, nu go ollusat earát ge, fuomášii yoga go rumaš ii šat doaibman nu mo galggai. Geahččalii moatti yogavuogi, muhto maŋáčassii gávnnahii ahte ashtanga yoga heive sutnje buoremusat.
Ashtanga yoga lea dynamálaš yogastallanvuohki, mas leat máŋggat lihkastagat maŋŋálagaid ja mas juohke lihkastat doalvu nubbái. Lihkastagat čadnojit oktii vuoigŋamiin, geahčastagaiguin jogo rabas- dahje gittačalmmiid ja lohkaiguin mat buot veahkehit rupmaša buhttásmuvvat, seammás go olmmoš šaddá soddjilat. Lihkastagaid bokte oahppá olmmoš fokuseret, vuoigŋat ja gievrudit iežas rumašlaččat ja mentalalaččat.
Yin yoga lea terapevtálaš yogavuohki. Dan guhkes lihkastahat jaskkodahttet sihke rupmaša ja miela.
Gunvor lea movttegis ja geasuheaddji olmmoš. Su yogabottuin dovdá olmmoš iežas oadjebassan go Gunvor oaidná juohkehačča ja veahkeha nu ahte yogastalli nagada daid váddáseamos lihkastagaid ge.
Gunvor ássá Johkamohkis Ruoŧas. Son jámma oahpaha yoga neahta bokte. Su neahttabottuide bohtet maid olbmot go deaivá leat Guovdageainnus gos bargá. Soai leaba Birehiin bargan ovttas máŋggaid jagiid, moatti maŋimuš jagi doallan retreataid ovttas.
Gunvoras lea dárbu lihkadit. Su oaidná dávjá vázzimin, jođus gosa nu. Su ii leat eambbo doarredit go orru suovvan mannamin, muhto diet leaktu lea sutnje lunddolaš. Seamma leaktu lea dálvit čuoiggadettiin.
Go yin yoga oahpu válddii, de lei sutnje danne lunddolaš guorahallat mo dát yogavuohki lea ávkin daidda geat ollu hárjehallet ja dárbbašit ložžet čavgan suonaid, almmá makkár ge vuoitogáibádusaid haga..
Čális dahje čuojahastte jus hálidat Gunvora ságaide yoga birra.
e-poasta: gunvorguttorm@hotmail.com
+46-70-382 08 71
